தமிழர்களையோ முஸ்லிம்களையோ அடக்கி ஆள நாங்கள் நினைக்க வில்லை. நாட்டில் இன மத பேதமின்றி அனைவரும் ஒற்றுமையுடன் வாழவேண்டும் என்று பொது பல சேனா அமைப்பைச் சேர்ந்த ஞானசார தேரர் தெரிவித்தார்.
அரசாங்கம் இந்த நாட்டில் நல்லிணக்கத்தை ஏற்படுத்துவதற்காக பாடுபட்டு வருகின்றது. ஜனாதிபதி மைத்திரிபால சிறிசேன நல்லிணக்கத்தை ஏற்படுத்த பாடுபட்டு வருகின்றார். இந்த நல்லிணக்க முயற்சிக்கு நாம் ஆதரவு தெரிவிக்கின்றோம் என்றும் தேரர் சுட்டிக்காட்டினார்.
மட்டக்களப்புக்கு நீதியமைச்சர் விஜேதாச ராஜபக்ஷவுடன் விஜயம் செய்த ஞானசார தேரர் மட்டக்களப்பு மங்களராமய விகாரையில் இடம் பெற்ற கலந்துரையாடலின் பின்னர் ஊடகங்களுக்குகருத்து தெரிவிக்கையிலேயே மேற்கண்டவாறு கூறினார்.
அவர் தொடர்ந்து கருத்து தெரிவிக்கையில்
நாங்கள் இந்த நாட்டில் வாழும் தமிழர்களையோ அல்லது முஸ்லிம்களையோ அடக்கி ஆள நினைக்க வில்லை. இந்த நாட்டில் இன மத பேதமின்றி அனைவரும் ஒற்றுமையுடன் வாழவேண்டும்.
கிழக்கு மாகாணத்தில் குறிப்பாக மட்டக்களப்பு மாவட்டத்தில் சிங்கள மக்களின் அடிப்படை உரிமைகள் மீறப்பட்டுள்ளன. கிழக்கு மாகாணத்தில் சிங்கள மக்கள் எதிர் நோக்கும் பிரச்சினைகள் அவர்களின் கோரிக்கைகள் தொடர்பில் நாம் நீதியமைச்சருக்கும் அரசாங்கத்திற்கும் எடுத்துக் கூறியுள்ளோம்.
இந்த நாட்டில் அனைத்து மக்களுக்கும் பிரச்சினைகள் உள்ளன என்பதை நாங்கள் அறிவோம். யுத்தத்திற்கு முன்னர் மட்டக்களப்பு மாவட்டத்தில் வாழ்ந்த சிங்கள குடும்பங்கள் இன்று மட்டக்களப்பு மாவட்டத்தில் மீள குடியேறுவதில் பல் வேறு பிரச்சினைகளை எதிர் நோக்கி வருகின்றன . அவர்களுக்கு இன்று இங்கு வாக்களிக்கவும் முடியவில்லை.
கிழக்கு மாகாணத்தில் சிங்கள பௌத்த மக்கள் எதிர் நோக்கும் பிரச்சினைகள் தீர்க்கப்படல் வேண்டும். அவர்கள் யுத்தத்திற்கு முன்னர் வசித்த பகுதிகளில் மீள குடியேற வசதி செய்யப்படல் வேண்டும்.
அரசாங்கம் இந்த நாட்டில் நல்லிணக்கத்தை ஏற்படுத்துவதற்காக பாடுபட்டு வருகின்றது. ஜனாதிபதி மைத்திரிபால சிறிசேன நல்லிணக்கத்தை ஏற்படுத்த பாடுபட்டு வருகின்றார்.
இந்த நல்லிணக்க முயற்சிக்கு நாம் ஆதரவு தெரிவிக்கின்றோம். நாட்டை மீட்பதற்காக யுத்தம் செய்த படை வீரர்களின் தடயங்கள் இங்கு அழிக்கப்பட்டுள்ளன. அவைகள் பாதுகாக்கப்படல் வேண்டும்.
தொல் பொருள் ஆராய்ச்சிகள் மேற் கொள்ளப்பட்டு அவைகள் பாதுகாக்கப்படல் வேண்டும்.
அது சிங்கள மக்களுக்காக மாத்திரமல்ல அனைத்து சமூகங்களின் நன்மைக்காகவும் அது பாதுகாக்கப்படல் வேண்டும் என்றார்.