இவ்வருடம் ஹஜ் கடமையை நிறைவேற்றுவதற்காக விண்ணப்பித்துள் விண்ணப்பதாரிகள் ஹஜ் கடமைக்காக தெரிவு செய்யப்பட்டால் அவர்கள் தமது பயணத்தை உறுதி செய்வதற்காக மீளப்பெற்றுக் கொள்ளும் வகையில் 50 ஆயிரம் ரூபா முதற் கட்டணம் அறவிடப்படுமென அரச ஹஜ் குழுவின் உறுப்பினரும் முஸ்லிம் சமய விவகார மற்றும் தபால், தபால் சேவைகள் அமைச்சரின் பிரத்தியேகச் செயலாளருமான எம்.எச்.எம். பாஹிம் தெரிவித்தார்.
இவ்வருட ஹஜ் ஏற்பாடுகள் தொடர்பில் கருத்து வெளியிடுகையிலேயே அவர் இவ்வாறு கூறினார். தொடர்ந்தும் அவர் கருத்து தெரிவிக்கையில்,
‘அறவிடப்படும் முற்கட்டணம் அவர் பயணிக்கும் முகவருக்குச் செலுத்த வேண்டிய கட்டணத்திலிருந்து குறைக்கப்படும். இதேவேளை முற்கட்டணம் செலுத்திய ஒருவர் தவிர்க்க முடியாத காரணங்களினால் பயணத்தை மேற்கொள்ள முடியாத நிலை ஏற்பட்டால் அக்கட்டணம் உடனடியாக அவருக்குத் திருப்பி வழங்கப்படும்.
ஹஜ் விண்ணப்பதாரிகளுக்கான அறிவுறுத்தற் கூட்டங்கள் எதிர்வரும் மார்ச் மாதம் முதல் மாவட்ட ரீதியில் நடத்துவதற்கு ஏற்பாடுகள் செய்யப்பட்டுள்ளன. அக்கூட்டங்களின் போது விண்ணப்பதாரிகள் தமது பயணத்தை உறுதி செய்ய வேண்டும்.
ஹஜ் கடமைக்காக சிலர் பலரது பெயர்களை திணைக்களத்தில் பதிவு செய்துள்ளமை கண்டுபிடிக்கப்பட்டது. ஹஜ் கடமையை இவ்வருடம் எண்ணியிருக்காதவர்களின் பெயர்கள் கூட பதிவு செய்யப்பட்டுள்ளது.
எனவே ஹஜ் கடமை நிறைவேற்றுபவர்கள் தங்களது பயணத்தை கட்டாயமாக உறுதி செய்து கொள்ள வேண்டும் என்றார்.