 |
| காப்பக படம் - சென்ற வருடம் ஹஜ் சென்ற முதல் குழு |
2017 ஆம் ஆண்டின் புனித ஹஜ் கடமையை நிறைவேற்றுவதற்காக விண்ணப்பித்த யாத்திரிகர்களுக்கு முஸ்லிம் சமய பண்பாட்டலுவல்கள் திணைக்களத்தினால் தபாலில் அனுப்பி வைக்கப்பட்டுள்ள கடிதங்களில் குளறுபடிகள் ஏற்பட்டுள்ளதாக பலர் முஸ்லிம் சமய விவகார அமைச்சு, அரச ஹஜ் குழு முஸ்லிம் சமய பண்பாட்டலுவல்கள் திணைக்களத்துக்கு முறைப்பாடு செய்துள்ளார்கள்.
பிழையான பதிவு இலக்கங்கள், பிழையான பெயர்கள் குறிப்பிட்டு கடிதங்கள் அனுப்பி வைக்கப்பட்டுள்ளதால் அசௌகரியங்களை எதிர்நோக்கியுள்ளதாக முறையிட்டுள்ளனர்.
இவ்விவகாரம் தொடர்பில் முஸ்லிம் சமய பண்பாட்டலுவல்கள் திணைக்களத்தின் பதில் பணிப்பாளர் எம்.எல்.எம். அன்வர் அலியை தொடர்பு கொண்டு வினவியபோது “ஆயிரக்கணக்கில் கடிதங்கள் தபாலில் சேர்க்கப்பட்டன. இந்தப் பணிகளில் ஈடுபட்ட ஊழியர்களின் தவறினாலும் கவனக் குறைவினாலுமே இந்நிலைமை ஏற்பட்டுள்ளது. அவ்வாறு பெயர் மற்றும் பதவிலக்கம் தவறாக குறிப்பிட்டு கடிதங்கள் கிடைக்கப் பெற்றவர்கள் திணைக்களத்தை 011 2672646 அல்லது 077 9774219 எனும் இலக்கத்துடன் தொடர்பு கொள்ளும்படி வேண்டிக் கொள்கிறேன்.அவ்வாறு தவறான கடிதங்கள் கிடைக்கப் பெற்றவர்களின் பிரச்சினைகள் உடன் தீர்க்கப்படும் என்றார்.
முஸ்லிம் சமய விவகார திணைக்களத்தினால் முன்னெடுக்கப்படும் ஹஜ் யாத்திரை தொடர்பான நடவடிக்கைகள் வருடாந்தம் குளறுபடிகளை ஏற்படுத்துவது கவலைக்குரியதாகும்.
கடந்த பல வருடங்களாக இந்த ஹஜ் ஏற்பாடுகள் தொடர்பில் தோன்றும் முரண்பாடுகள் காரணமாக நீதிமன்றத்தில் பல வழக்குகள் தொடரப்பட்டுள்ளமை குறிப்பிடத்தக்கதாகும்.