வில்பத்து சரணாலயத்துக்கு வடக்கே உள்ள நான்கு வன பிரதேசங்களை பாதுகாக்கப்பட்ட பகுதியாக பிரகடனப்படுத்தும் வர்த்தமானி அறிக்கையில் ஜனாதிபதி கையெழுத்திட்டுள்ளார்.
இதற்கமைய இப் பிரதேசம் வன இலாகா திணைக்களத்துக்குச் சொந்தமாக்கப்பட்டுள்ளது.
ஜனாதிபதி மைத்திரிபால சிறிசேன ரஷ்யாவுக்கு உத்தியோகபூர்வ விஜயம் மேற்கொண்டுள்ள நிலையிலேயே இந்த வர்த்தமானி அறிவித்தலில் ஒப்பமிட்டுள்ளதாக அறிவிக்கப்பட்டுள்ளது.
வில்பத்து தேசிய சரணாலயத்துக்கு வடக்காக அமைந்துள்ள வன பாதுகாப்பு திணைக்களத்துக்குரிய மாவில்லு, வெப்பல், மறிச்சிக்கட்டி, விளாத்திக்குளம், பெரியமுறிப்பு ஆகிய பாதுகாக்கப்பட்ட வனங்கள் இணைக்கப்பட்டு வன பாதுகாப்பு கட்டளைச் சட்டத்தின் ‘3A’ பிரிவின் கீழ் ‘மாவில்லு பாதுகாக்கப்பட்ட வனம்’ என பிரகடனப்படுத்தப்பட்டு
ஜனாதிபதி மேற்படி வர்த்தமானி பிரகடனத்தில் கையொப்பமிட்டுள்ளதன் மூலம் முஸ்லிம் மக்கள் அப் பகுதியில் தொடர்ந்து வாழ்வது கேள்விக்குறியாகியுள்ளது
மேற்படி பகுதிகளுக்குள் முஸ்லிம்களுக்குச் சொந்தமான காணிகளும் உள்ளடங்குகின்றன என்ற போதிலும் இது தொடர்பில் முஸ்லிம் அரசியல்வாதிகள் இதுவரை எந்த கருத்துகளையும் வெளியிடவில்லை. முஸ்லிம் தலைமைகள் இவ்வாறு மௌனம் காப்பது கவலைக்குரியதாகும்.
இந்த வர்த்தமானி அறிவித்தலை இரத்துச் செய்யக் கோரி சிவில் அமைப்புகள் வழக்குத் தாக்கல் செய்யவுள்ளதாக அறிவித்துள்ள நிலையில் முஸ்லிம் அரசியல் தலைமைகள் தமது கடமையைச் செய்ய முன்வர வேண்டும்.
உடனடியாக 21 முஸ்லிம் எம்.பி.க்களும் ஒன்றிணைந்து ஜனாதிபதியை நேரில் சந்தித்து இதனை இரத்துச் செய்யுமாறு கோர வேண்டும். இன்றேல் வீதியிலிறங்கிப் போராட வேண்டும். இன்றேல் இந்த 21 பேரும் கையாலாகாதவர்கள் என்பதை மீண்டும் நிரூபிப்பதாக இது அமைந்துவிடும்.
