எஸ்.என்.எம்.சுஹைல்
நாட்டில் அண்மைக்காலமாக முஸ்லிம்களுக்கு எதிராக முன்னெடுக்கப்படும் இனவாத நடவடிக்கைகளுக்கு எதிராக பொலிஸாரினால் நடவடிக்கை எடுக்க முடியாவிடின் இவ்விவகாரத்தை இராணுவத்தினரிடம் ஒப்படைக்கலாம் என ஜனாதிபதி மைத்திரிபால சிறிசேன தெரிவித்தார்.
ஆளும் கட்சி குழு கூட்டம் நேற்று பாராளுமன்ற ஆளும்கட்சி குழு அறையில் இடம்பெற்றது. இதன்போது, பாராளுமன்ற உறுப்பினர் முஜிபுர் ரஹ்மான் தற்போது நாட்டில் இடம்பெறும் முஸ்லிம்களுக்கு எதிரான நடவடிக்கைகள் குறித்து ஜனாதிபதியிடம் சுட்டிக்காட்டினார். இதன்போதே ஜனாதிபதி மேற்கண்டவாறு தெரிவித்தார்.
ஆளும் கட்சி குழுக்கூட்டம் நேற்று மாலை இடம்பெற்றது. இதன்போது, இன்றைய தினம் பாராளுமன்றில் இடம்பெறவிருக்கும் அனர்த்தங்கள் குறித்த விவாதம் குறித்து ஆராயப்பட்டது. இந்த கூட்டத்தின் முடிவில் கொழும்பு மாவட்ட பாராளுமன்ற உறுப்பினர் முஜிபுர் ரஹ்மான் எழுந்து, "இங்கு இடம்பெறும் கூட்டத்திற்கும் நான் முன்வைக்கும் கருத்துக்கும் வித்தியாசம் இருக்கலாம். ஆனால், இயற்கை அனர்த்தத்தைப்போன்று இன்று நாட்டில் இனவாதத்தால் ஏற்படும் பாதிப்புகள் அதிகமாக அமையக் கூடும். எனவே இவ்விடயம் குறித்து ஜனாதிபதி கவனத்தில் கொள்ளவேண்டும்.
குறிப்பாக நாளுக்கு நாள் முஸ்லிம்களுக்கு எதிரான நடவடிக்கைகள் அதிகரித்தே செல்கின்றன. கடந்த ஐந்து நாட்களில் நான்கு சம்பவங்கள் இடம்பெற்றுள்ளன. மஹரகம பகுதியில் மூன்று கடைகள் மீது தாக்குதல் நடத்தப்பட்டுள்தோடு திருகோணமலையில் பள்ளிவாசல் ஒன்றுக்கு பெற்றோல் குண்டு வீசப்பட்டுள்ளது.
இது அரசாங்கத்தை கவிழ்க்க எடுக்கப்பட்டிருக்கும் முயற்சியின் ஒரு வடிவமாகும். இது குறித்து ஜனாதிபதி கூடுதல் கவனம் செலுத்த வேண்டும் என முஜிபுர் ரஹ்மான் எம்.பி. மேலும் தெரிவித்தார்.
இதன்போது, அமைச்சர் ரிஷாட் பதியுதீன் மற்றும் ஏ.ஆர்.இஷாக் எம்.பி ஆகியோர் இவ்விவகாரம் குறித்ததான சீ.சீ.ரி.வி. ஆதாரம் இருப்பதாகவும் பொலிஸார் நடவடிக்கை எடுக்காதிப்பதாகவும் சுட்டிக்காட்டினார்.
இதன்போது கருத்து வெளியிட்ட ஜனாதிபதி, இனவாத செயற்பாடுகளுக்கு எதிராக நடவடிக்கை எடுக்குமாறு நாம் பொலிஸாருக்கு பணிப்புரை விடுத்திருக்கிறோம்.
இவர்கள் இனவாதத்திற்கு எதிராக சட்டத்தை அமுல்படுத்தவேண்டும் என எதிர்பார்க்கிறோம். பொலிஸாரால் இவ்விடயத்தை கையாள முடியவில்லை எனில் இராணுவத்திற்கு இதனை கையாளுமாறு ஒப்படைக்கலாம் என்றார்.
Post a Comment