கடந்த வருடம் கண்டி மற்றும் திகன பகுதிகளில் இடம்பெற்ற வன்செயல்களினால் பாதிக்கப்பட்ட சொத்துக்களுக்கான நஷ்டஈடு வழங்கும் பணிகள் துரிதப்படுத்தப்பட்டுள்ளன.
பாதிக்கப்பட்ட சொத்துக்களில் இதுவரைகாலம் நஷ்டஈடு வழங்கப்படாதுள்ள 174 சொத்துக்களுக்கு 17 கோடி 5 இலட்சத்து 67 ஆயிரம் ரூபாய் நஷ்டஈடு வழங்கப்படவுள்ளது.
நஷ்ட ஈடு வழங்குவதற்காக அமைச்சரவையின் அங்கீகாரத்தைப் பெற்றுக் கொள்வதற்காக புனர்வாழ்வு அதிகார சபைக்குப் பொறுப்பான அமைச்சராகச் செயற்படும் பிரதமர் ரணில் விக்கிரமசிங்க இன்று அமைச்சரவைப் பத்திரமொன்றினைச் சமர்ப்பிக்கவுள்ளார்.
இது தொடர்பில் புனர்வாழ்வு அதிகார சபையின் மேலதிகப் பணிப்பாளர் எஸ்.எம்.பதூர்தீன் கருத்து தெரிவிக்கையில், கடந்த வருடம் கண்டி மற்றும் திகன பகுதிகளில் இடம்பெற்ற வன்செயல்களினால் பாதிப்புக்குள்ளான 546 சொத்துக்களுக்கு நஷ்டஈடு வழங்குவதற்கு புனர்வாழ்வு அதிகார சபை தேவையான நடவடிக்கைகளைப் பூர்த்தி செய்திருந்தது. இவற்றில் 372 சொத்துக்களுக்கு ஏற்கனவே நஷ்டஈடு வழங்கப்பட்டு விட்டது. அவ்வாறு வழங்கப்பட்டுள்ள நஷ்ட ஈட்டின் பெறுமதி 19 கோடி 48 இலட்சத்து 45 ஆயிரம் ரூபாவாகும்.
தற்போது 174 சொத்துக்களுக்கே நஷ்ட ஈடு வழங்கப்பட வேண்டியுள்ளது. இதற்காக 17 கோடி 5 இலட்சத்து 67 ஆயிரம் ரூபா ஒதுக்கீடு செய்யப்படவேண்டியுள்ளது. அமைச்சரவையின் அங்கீகாரம் கிடைக்கப்பெற்றதும் உடனடியாக நஷ்டஈடுகள் வழங்கப்படும். இதில் பாதிக்கப்பட்ட பள்ளிவாசல்களும் அடங்கியுள்ளன.
நஷ்டஈடு பெற்றுக்கொள்ள விண்ணப்பித்த விண்ணப்பதாரிகளில் 16 விண்ணப்பங்கள் நிலுவையிலுள்ளன. அந்தச் சொத்துக்களின் நஷ்டங்களை மதிப்பீடு செய்யமுடியாது என மதிப்பீட்டுத் திணைக்களம் அறிவித்துள்ளது. பாதிக்கப்பட்ட பொருட்களுக்கான ஆவணங்கள் இன்மையே இதற்குக்காரணமாகும். அதனால் இதற்கென குழுவொன்று நியமிக்கப்பட்டு நஷ்டங்களை மதிப்பீடு செய்யப்படவுள்ளது. அக்குழுவின் மதிப்பீடுகளுக்கு அமைய அந்த சொத்துக்களுக்கான நஷ்டஈடு நிர்ணயிக்கப்படும் என்றார்.
இதேவேளை அஞ்சல், அஞ்சல் சேவைகள் மற்றும் முஸ்லிம் சமய விவகார அமைச்சர் எம்.எச்.ஏ.ஹலீம் கண்டி மற்றும் திகன வன்செயல்களினால் பாதிக்கப்பட்ட சொத்துக்களுக்கான நஷ்டஈடுகள் வழங்குவதைத் துரிதப்படுத்தும்படி விடயத்துக்குப் பொறுப்பான அமைச்சர் பிரதமர் ரணில் விக்கிரமசிங்கவை கோரியுள்ளார்.
‘நஷ்டஈடு வழங்கும் நடவடிக்கை தேக்கம்’ என்ற பிரதான தலைப்பில் ‘விடிவெள்ளி’ செய்தி வெளியிட்டதைத் தொடர்ந்து அமைச்சர்களான எம்.எச்.ஏ.ஹலீம், ரவூப் ஹக்கீம் மற்றும் ரிசாத் பதியுதீன் ஆகியோர் புனர்வாழ்வு அதிகார சபையைத் தொடர்பு கொண்டு அது தொடர்பான விபரங்களைக் கோரியிருந்தமையும், இதனை பிரதமரின் கவனத்திற்குக் கொண்டு வந்தமையும் குறிப்பிடத்தக்கது.
முன்னைய அரசாங்கத்தில் புனர்வாழ்வு அதிகார சபைக்குப் பொறுப்பான அமைச்சராக இருந்த டி.எம்.சுவாமிநாதன் தனது பதவிக்காலத்தில் நஷ்டஈடு வழங்குவதற்கான அமைச்சரவைப் பத்திரத்தை தயார்செய்திருந்தமை குறிப்பிடத்தக்கது.